Ar y Blaen

Ariennir Ar y Blaen gan arian sydd wedi gorwedd yn segur mewn cyfrifon banc a chymdeithas adeiladu ar draws y DU ers 15 mlynedd neu fwy. Mae'r ffordd a wariwn yr arian hwn yng Nghymru wedi cael ei phenderfynu gan Lywodraeth Cymru, sydd wedi cyhoeddi cyfarwyddiadau polisi ar ein cyfer yn amlinellu ei blaenoriaethau cefnogi plant a phobl ifanc. Mae'r Gronfa Loteri Fawr wedi cydweithio'n agos â Llywodraeth Cymru i ddatblygu'r rhaglen hon.

Mae'r rhaglen yn anelu at ymgysylltu â phobl ifanc 16-18 oed, eu paratoi a'u symbylu i ymgymryd â lleoliad gwaith a gefnogir am chwe mis er mwyn gwella'u cyfleoedd o symud ymlaen at gyflogaeth gynaliadwy neu ddysgu pellach trwy gynyddu eu sgiliau cyflogadwyedd.

Bydd yn targedu:

• Pobl ifanc 16-18 oed sydd wedi troseddu. Gan bobl ifanc sydd wedi troseddu, golygwn y rhai sydd mewn cyswllt â'r, neu'n adnabyddus i'r, tîm troseddu ieuenctid (TTI) lleol. Gallant gynnwys cyn-droseddwyr a'r rhai sydd mewn sefydliadau troseddwyr ifanc ar hyn o bryd
• Y rhai sy'n cyfateb i'r diffiniad o rywun sy'n gadael gofal, fel yr amlinellir yn Neddf Plant (Gadael Gofal) 2000, rhwng 16 a 18 oed.

O ganlyniad i'r prosiect, disgwyliwn weld y canlyniadau a ganlyn yn cael eu cyflawni:

• Pobl ifanc wedi'u dadrithio sy'n agosach at ymgysylltu â'r farchnad lafur o ganlyniad i ddatblygu sgiliau cyflogadwyedd a chaffael cymwysterau mewn sgiliau allweddol sylfaenol trwy leoliadau gwaith a gefnogir â thâl
• Bydd mudiadau trydydd sector a sector cyhoeddus wedi gweithio mewn partneriaeth i ddarparu cyfleoedd profiad gwaith sy'n gwella cyfleoedd pobl ifanc o ddod o hyd i swydd trwy eu paratoi ar gyfer y farchnad lafur.
• Mae dysgu o'r rhaglen wedi'i gipio a'i defnyddio i gyfeirio datblygiad polisïau ym maes cyflogaeth a sgiliau ieuenctid yn y dyfodol.

Dim ond mudiadau trydydd sector â chyfansoddiad ffurfiol sy'n gallu gweithredu ledled Cymru all ymgeisio. Mae'n rhaid iddynt fedru gweithio gydag ystod o bartneriaid ar lefel leol yn y trydydd sector a'r sectorau cyhoeddus a phreifat i alluogi'r prosiect i ddod o hyd i'r lleoliadau gwaith angenrheidiol a darparu'r gefnogaeth y mae ei hangen ar y bobl ifanc.

Os byddwch yn ymgeisio i'r rhaglen, bydd angen i'ch cais ddangos eich bod wedi trefnu'r partneriaethau y mae eu hangen i fedru darparu lleoliadau gwaith wedi'u teilwra i anghenion y buddiolwyr. Byddwn yn ariannu un grant o hyd at £3.4 miliwn ar gyfer prosiect Cymru gyfan sy'n para am ddwy flynedd.

Gallwch ymgeisio am:

• holl gostau eich prosiectau neu ran ohonynt am hyd at ddwy flynedd
• cyfraniad at gostau cyffredinol y bartneriaeth
• cyfarpar cyfalaf, megis cyfrifiaduron, hyd at £50,000.