Teganau mwnci i helpu plant sy'n ddifrifol wael i gynnal cysylltiadau â chymheiriaid

Area:

Cymru

Programme:

Arian i Bawb Cymru

Release date:

19 2 2013

Bydd teganau mwnci'n gweithredu fel eilydd ar gyfer plant ysgol pan fyddant i ffwrdd o'r dosbarth gyda thiwmor yr ymennydd neu salwch difrifol arall diolch i brosiect sy'n cael ei lansio yng Nghymru am y tro cyntaf.

At ei gilydd bydd 43 o brosiectau cymunedol ledled Cymru'n rhannu'r £164,203 a ddyfarnwyd o dan rownd ddiweddaraf Arian i Bawb, rhaglen grantiau bach y Gronfa Loteri Fawr (rhestr lawn y dyfarniadau ar ddiwedd y datganiad. Cysylltwch â Ben Payne i gael disgrifiadau prosiect llawn).

Yn lansio ar draws Cymru, bydd Brain Tumour Buddies yn derbyn £5,000 ar gyfer ei gynllun Monkey Buddies. Bydd y grŵp yn darparu 'citiau mwnci' a grëwyd gan Love, Chloe Foundation (USA) sy'n cynnwys y tegan mwnci mawr fel eilydd ar gyfer yr ystafell ddosbarth ynghyd â phrimat llai i aros gyda phlentyn sydd â diagnosis o diwmor yr ymennydd neu salwch difrifol arall, gan gynnwys mathau eraill o ganser a chyflyrau niwrolegol.

Bydd y citiau'n cynnwys siwrnal, albwm lluniau, camera tafladwy, bathodyn, ysgrifbinnau a phensiliau ynghyd â bag y mae'r mwnci'n ei gludo i'r ysgol er mwyn i'r plentyn a'i gyfeillion gyfnewid nodiadau a lluniau yn ystod unrhyw absenoldeb.

A bydd pecyn i athrawon yn cynnwys adnoddau i helpu esbonio'r hyn sy'n digwydd i'r plentyn, darparu mwy o ddealltwriaeth o diwmor yr ymennydd ac amlinellu'r heriau a wynebir yn ystod ac ar ôl y driniaeth.

Meddai Natalya Jagger, o Brain Tumour Buddies: "Mae diagnosis o salwch difrifol yn aml yn golygu amser i ffwrdd o'r ysgol. Gall fod yn ddiwrnod yma ac acw neu efallai wythnosau neu fisoedd ar y tro - gall hwn fod yn anodd i blant ac i'w cymheiriaid yn y dosbarth. Bydd citiau mwnci'n rhoi cyfle i blant barhau i gymryd rhan ac aros mewn cysylltiad â'i gilydd.

“Gobeithiwn gynnal cysylltiadau gydag ysbytai a mudiadau yng Nghymru sy'n trin plant â thiwmor yr ymennydd a salwch difrifol eraill er mwyn i ni gyrraedd cynifer o blant â phosib, a'u helpu i gynnal perthynas wych gyda'u hathrawon a'u cymheiriaid yn y dosbarth.”

Datgelodd arolwg o rieni, gweithwyr meddygol proffesiynol a gweithwyr cymdeithasol a gyflawnwyd gan y prosiect angen gwirioneddol i'r plant a'u cymheiriaid gadw mewn cysylltiad.

"Helpodd yr arolwg i ni ddeall yr anawsterau y mae plant sydd wedi cael diagnosis o diwmor yr ymennydd a mathau eraill o ganser yn eu profi pan fydd yn rhaid iddynt dreulio llawer o amser i ffwrdd o'r ysgol a'u ffrindiau," ychwanegodd Natalya. "Roeddem hefyd yn gallu cael gwell dealltwriaeth o'r ffyrdd y gallem gefnogi athrawon yn ystod salwch y claf a chynlluniau'r disgybl ar gyfer dychwelyd i'r ysgol."

Ymysg y grwpiau eraill sy'n elwa o'r rownd ariannu diweddaraf mae A Different Beat, a fydd yn defnyddio £4,990 i gyflwyno 28 o weithdai synhwyraidd i oedolion, pobl ifanc a phlant ag anawsterau dysgu ym Mhowys a Sir Fynwy. Bydd y sesiynau'n gwella cyfathrebu, hyder, ymddygiad a datblygu sgiliau echddygol a gwybyddol.

Meddai Lynn Kay o A Different Beat: "Bydd yn ein galluogi ni i ddarparu gweithdai cerdd amlsynhwyraidd ar gyfer pobl na allent wneud gweithgareddau celf byw oherwydd cyfuniad o dlodi, unigedd gwledig ac anableddau."

Bydd Rhondda Breast Friends (RBF) yn Rhondda Cynon Taf yn derbyn £4,910 i ddarparu gwasanaethau cwnsela, diwrnod maldodi a gwibdaith gymdeithasol i fenywod sydd wedi cael diagnosis o ganser y fron, a bydd Coleg Iâl yn Wrecsam yn derbyn £5,000 i sefydlu gwasanaeth sain ddigidol newydd i bobl ddall ac â golwg rhannol, i'w hysbysu am ddiweddariadau teithio, newyddion lleol a materion lleol yn null cylchgrawn.

Meddai rheolwr y ganolfan Rhondda Breast Friends Christina Ryan: “Bydd y grant yn rhoi cyfle unigryw i ni gyrraedd cynulleidfa ehangach a chodi ymwybyddiaeth y cyhoedd o'r hyn y mae RBF yn ei gynnig. Ar ben hynny, bydd yr ariannu hefyd yn ein galluogi i ddarparu sesiynau therapi a chwnsela cynyddol i'n haelodau, ynghyd â'u cynorthwyo nhw gyda chostau cludiant.

"Mae rhai o'n haelodau'n gaeth i'r tŷ bellach oherwydd eu salwch ac nid oes cludiant ganddynt, felly gallwn barhau i ddarparu cludiant bellach, gan eu galluogi i fynychu cyfarfodydd deufisol yn ein canolfan yn Y Porth. Bydd yr ariannu'n golygu y gallwn barhau â'r gefnogaeth y mae angen mawr amdani ar gyfer ein haelodau."

Bydd Ysgol Gynradd Meadowlane yng Nghaerdydd yn gwario £2,481 ar glwb ar ôl ysgol Clever Chefs i hyrwyddo deiet iach, ac wrth i Ddydd Gŵyl Dewi ddod yn nes, bydd Parêd Gŵyl Dewi Aberystwyth yng Ngheredigion yn derbyn £2,258 i gynnal parêd ar 1 Mawrth.
         
Meddai Gareth Williams, Rheolwr Rhaglen Arian i Bawb y Gronfa Loteri Fawr yng Nghymru: “Mae Arian i Bawb yn cael effaith gadarnhaol ledled Cymru. Mae'r arian yn helpu sefydlu grwpiau, cymdeithasau a chlybiau, gan hyrwyddo dysgu, cynyddu cyfleoedd gwirfoddoli a helpu adeiladu cymunedau cryfach.”      

Mae'r ffurflen gais ar gael yn Gymraeg a Saesneg a gellir ei lawrlwytho o www.arianibawb.org.uk neu dros y ffôn ar 0845 4 10 20 30.

Rhestr lawn y dyfarniadau

Mwy o Wybodaeth:
Ben Payne - Swyddfa Wasg y Gronfa Loteri Fawr: 029 2067 8224
Cyswllt y tu allan i oriau:  07500 951 707
Llinell Ymholiadau Cyhoeddus: 0300 123 0735                           Ffôn testun:    0845 6021 659
Mae manylion llawn rhaglenni a dyfarniadau grant y Gronfa Loteri Fawr ar gael yn: www.biglotteryfund.org.uk
Gofyn cwestiwn i'r Gronfa Loteri Fawr yma: http://ask.biglotteryfund.org.uk/cymorth/wales/
Dilynwch y Gronfa ar Twitter: www.twitter.com/loterifawrcymru
Dod o hyd i'r Gronfa ar facebook: www.facebook.com/biglotteryfundwales 

Nodiadau i Olygyddion
• Yng Nghymru mae'r Gronfa Loteri Fawr yn dosbarthu bron £100,000 y diwrnod mewn arian y Loteri Genedlaethol ar gyfer achosion da, sy'n golygu, ynghyd â dosbarthwyr eraill y Loteri, bod y rhan fwyaf o bobl ar draws Cymru o fewn ychydig filltiroedd i brosiect a ariennir gan y Loteri.
• Mae'r Gronfa Loteri Fawr, dosbarthwr mwyaf y Loteri Genedlaethol ar gyfer achosion da, wedi bod yn dosbarthu grantiau i feysydd addysg a'r amgylchedd ac achosion elusennol ers iddi ddod i fodolaeth ym mis Mehefin 2004. Fe'i sefydlwyd gan Senedd y DU ar 1 Rhagfyr 2006.
• Ers i’r Loteri Genedlaethol ddechrau ym 1994, mae 28c o bob punt sy’n cael ei gwario gan y cyhoedd wedi mynd i achosion da. O ganlyniad i hyn mae dros £29 biliwn wedi’i godi a mwy na 383,000 o grantiau wedi’u dyfarnu ar draws meysydd y celfyddydau, chwaraeon, treftadaeth, elusennau, iechyd, addysg a’r amgylchedd.

Tags