Cymorth MAWR i wella ymwybyddiaeth a chefnogaeth i ddioddefwyr trais domestig

Area:

Cymru

Programme:

Arian i Bawb Cymru

Release date:

16 10 2012

Mae grwpiau sy'n cynyddu ymwybyddiaeth o gyflyrau iechyd anarferol a phrosiect sy'n cefnogi dioddefwyr trais domestig ymysg y rhai sy'n rhannu'r rownd ddiweddaraf o arian gan y Loteri Genedlaethol.

At ei gilydd bydd 44 o brosiectau cymunedol ledled Cymru'n rhannu'r £178,347 a ddyfarnwyd o dan rownd ddiweddaraf Arian i Bawb, rhaglen grantiau bach y Gronfa Loteri Fawr (rhestr lawn y dyfarniadau ar ddiwedd y datganiad. Cysylltwch â Ben Payne i gael disgrifiadau llawn o'r prosiectau).

Bydd £4,375 gan Arian i Bawb yn dod â The Arthrogryposis Group i Gymru am y tro cyntaf, gan godi ymwybyddiaeth o'r cyflwr anarferol. Mae pobl gyda Arthrogryposis amryfath cydenedigol yn cael eu geni gyda chymalau crwm mewn nifer o rannau o'r corff. Mae'r cyflwr yn amrywio'n fawr a gall effeithio ar bob unigolyn mewn ffordd wahanol. Bydd yr ariannu'n cynnal 'Big Welsh Meet' yng Nghymru a fydd yn helpu i godi ymwybyddiaeth o'r cyflwr a'r driniaeth sydd ar gael.

Bydd y digwyddiad yn annog unigolion a theuluoedd sy'n cael eu heffeithio gan arthrogryposis i rannu profiadau a dod o hyd i wybodaeth. Bydd y gefnogaeth hon yn eu galluogi i rannu profiadau o lygad y ffynnon o fyw ac ymdopi â'r cyflwr.

Bydd y grwp hefyd yn helpu i hyfforddi gwirfoddolwyr i weithredu fel cwnsleriaid i ddarparu cefnogaeth ychwanegol ar gyfer teuluoedd sy'n cael eu heffeithio gan y cyflwr.

Meddai Jacqui Marr, Swyddog Cyswllt Cenedlaethol, The Arthrogryposis Group:  "Mae'n rhoi cyfle hefyd i ni gynnal cyfres o weithdai bod yn gyfaill gwirfoddol sydd â'r nod o drosglwyddo awgrymiadau ymarferol a darparu'r sgiliau angenrheidiol i aelodau o Gymru gefnogi pobl eraill sy'n ceisio cyngor a gwybodaeth ar arthrogryposis."

Mae'r Gymdeithas Anemia Dinistriol yng Nghastell-nedd Port Talbot yn grwp arall sy'n cynyddu ymwybyddiaeth o iechyd y mis yma. Dyfarnwyd £5,000 i'r prosiect. Gydag Anemia Dinistriol, ni all y corff amsugno fitamin B12.

Mae'r gymdeithas yn darparu gwybodaeth a chefnogaeth i ddioddefwyr, teuluoedd a ffrindiau, a defnyddir yr arian i greu cyfres o ddigwyddiadau i gynyddu ymwybyddiaeth o'r cyflwr hwn sy'n effeithio ar fywydau bob dydd. Bydd y digwyddiadau hefyd yn creu cysylltiadau â gweithwyr iechyd proffesiynol er mwyn treialu ffordd newydd o drin y cyflwr.

I gynyddu ymwybyddiaeth o gam-drin domestig, mae, Cymorth Menywod Pontypridd yn derbyn £4,546 i ddarparu hyfforddiant Pecyn Cymorth Ailsefydlu ar ôl Cam-drin Domestig ar gyfer dioddefwyr i gynyddu'r gefnogaeth sydd ar gael ar gyfer menywod yr effeithir arnynt gan gam-drin domestig.

Meddai'r rheolwr cyllid, Moira Jones: "Mae'r Pecyn Cymorth Ailsefydlu'n defnyddio model seico-addysgol sy'n seiliedig ar alluogi unigolion i ddeall ac ymdopi'n well â'u profiadau blaenorol trwy roi gwybodaeth iddynt. Mae cryfderau, adnoddau a sgiliau ymdopi'r unigolion yn cael eu cryfhau, gan gyfrannu at eu hiechyd a'u lles personol dros yr hir dymor.

Bydd y Pecyn Cymorth Ailsefydlu ar ôl Cam-drin Domestig yn cael ei redeg gan Sue Penna Associates ac yn cynnwys hyfforddiant datblygu hyder personol a hunanymwybyddiaeth.

Mae cangen canolbarth Cymru Motorcycle Action Group (MAG) yn Aberystwyth wedi derbyn grant Arian i Bawb o £2,500. Bydd yr arian hwn yn cael ei ddefnyddio i gynyddu'r wybodaeth a'r hyfforddiant sydd ar gael ar gyfer y rhai sydd â beiciau modur. Bydd MAG yn ymgysylltu â'r cyhoedd trwy sioeau teithiol, diwrnodau hyfforddiant a deunyddiau darllen, i gyd wedi'u cyflwyno gan wirfoddolwyr.

Bydd yn sicrhau hefyd bod y cyhoedd yn deall manteision defnyddio eu beiciau'n ddiogel trwy wella hyfforddiant, diogelwch ac ymwybyddiaeth.

Meddai Ian Williamson, o MAG,: "Bydd y grant yn galluogi MAG i gynorthwyo'r rhai sy'n ddifreintiedig neu o grwpiau lleiafrifol i gymryd y camau cyntaf tuag at fod yn annibynnol o ran cludiant, a bydd hefyd yn dangos i bobl y gall cludiant ar ddwy olwyn fod yn rhad ac yn llesol i'r amgylchedd.

Mae Prosiect Undod LGBT (lesbiaidd, hoyw, deurywiol a thrawsryw) Bae Abertawe wedi derbyn £5,000 i gynnal prosiect bod yn gyfaill yn Abertawe. Bydd y prosiect hwn yn cynnig gwasanaeth bod yn gyfaill er mwyn i bobl dros 55 oed ymwneud â'r gymuned lesbiaidd, hoyw, deurywiol a thrawsryw.

Yn gwella gwasanaethau i'r genhedlaeth hyn hefyd yw Gofal a Thrwsio Conwy, sydd wedi derbyn £4,477 i greu prosiect Rhannu Gwybodaeth.

Bydd yr ariannu'n galluogi rhannu adnoddau gyda'r cyhoedd, mudiadau'r trydydd sector ac asiantaethau i gynyddu ymwybyddiaeth o nwyddau a gwasanaethau. A bydd hefyd yn darparu cydau cymorth i bobl hyn i wella'u bywydau a'u diogelwch, gan alluogi iddynt barhau i fyw'n annibynnol yn eu cartrefi eu hunain.

Meddai Eirian James, swyddog datblygu, Gofal a Thrwsio Conwy: "Trwy'r prosiect hwn y gobaith yw y bydd pobl yn llai tebygol o gael eu twyllo trwy dderbyn gwybodaeth well am y risgiau."

Ymysg y prosiectau eraill sy'n gwella ymwybyddiaeth gymunedol mae prosiect darllen Cymdeithas Trigolion Pentre Mawr a gafodd ddyfarniad o £2,326. Bydd yr arian hwn yn galluogi plant i wella'u sgiliau darllen yn gyfnewid am ddysgu sgiliau technoleg ddigidol newydd i'r trigolion. Derbyniodd y grwp Cilgerran Walkers Are Welcome yn Sir Benfro ariannu o £4,850 i greu llyfryn dwyieithog o deithiau cerdded yn yr ardal. Gobeithir y bydd hwn yn cynyddu ymwybyddiaeth a gwybodaeth o'r ardal leol ymysg y gymuned, yn ogystal â denu twristiaid.

Meddai Gareth Williams, Rheolwr Rhaglen Arian i Bawb y Gronfa Loteri Fawr yng Nghymru: “Mae Arian i Bawb yn cael effaith gadarnhaol ledled Cymru. Mae'r arian yn helpu sefydlu grwpiau, cymdeithasau a chlybiau, gan hyrwyddo dysgu, cynyddu cyfleoedd gwirfoddoli a helpu adeiladu cymunedau cryfach.”

Mae ffurflenni cais ar gael i'w lawrlwytho yn Gymraeg a Saesneg o www.arianibawb.org.uk neu drwy ffonio 0845 4 10 20 30.

Rhestr lawn y dyfarniadau:

Mwy o Wybodaeth:

Swyddfa Wasg y Gronfa Loteri Fawr: 02920 678 224

Cyswllt y tu allan i oriau: 07500 951 707

Llinell Ymholiadau Cyhoeddus: 0300 123 0735

Ffôn testun: 0845 6021 659

Mae manylion llawn rhaglenni a dyfarniadau grant y Gronfa Loteri Fawr ar gael yn: www.cronfaloterifawr.org.uk

Tags