Chwerthin yn Donig i Gymunedau Cymru Diolch i Arian Mawr

Area:

Cymru

Programme:

Arian i Bawb Cymru

Release date:

30 4 2013

Dywedir mai chwerthin yw'r moddion gorau, ac mae buddion emosiynol a chorfforol chwerthin wedi cael eu disgrifio'n drwyadl.  

Dyna pam mae grŵp CBC Feelgood Communities ymysg y 65 o brosiectau cymunedol ar draws Cymru i rannu bron £240,000 a ddyfarnwyd o dan rownd ddiweddaraf y rhaglen grantiau bach Arian i Bawb (rhestr lawn y dyfarniadau ar gael ar ddiwedd y datganiad a disgrifiad llawn o’r prosiectau ar gael drwy glicio ar y ddolen yma).

Bydd CBC Feelgood Communities yn defnyddio eu dyfarniad o £5,000 i lansio'r Diwrnod Chwerthin Cenedlaethol Cymru (12 Mehefin 2013) cyntaf erioed - prosiect i hyrwyddo chwerthin ar draws y wlad. Amcan y prosiect yw darparu gweithgareddau lles a chwerthin i wella iechyd meddyliol a chyffredinol cymunedau www.feelgoodcommunities.com a https://www.facebook.com/laugh4wales.
   
Bydd y grŵp yn darparu sesiynau seiliedig ar gemau sy'n annog chwerthin a hunanymwybyddiaeth ac yn cynnwys amser ar gyfer trafodaethau a rhyngweithio fel grŵp. Mae'r sesiynau'n seiliedig ar y ffaith bod chwerthin wedi'i brofi i ymlacio'r corff cyfan, rhoi hwb i'r system imiwn, rhyddhau endorffinau a diogelu'r galon. Mae hyn yn arbennig o fuddiol i bobl â phroblemau iechyd meddwl, gofalwyr a phobl anabl sydd yn aml yn byw mewn amgylchiadau straenus. Bydd y sesiynau'n dod â phobl ynghyd o ystod helaeth o gefndiroedd i ddysgu ffyrdd newydd o leddfu straen, gan eu galluogi i ymdopi'n well. 

Bydd y grŵp yn gweithio i recriwtio gwirfoddolwyr a fydd yn rhedeg sesiynau chwerthin ar ôl Diwrnod Chwerthin Cenedlaethol cyntaf Cymru. Byddant hefyd yn ymgynghori â mudiadau cymunedol lleol ac yn cynnal sesiynau i ddangos i bobl yng Nghymru sut y gallant defnyddio chwerthin i wella'u hiechyd a'u hapusrwydd.  Yr amcan hir dymor yw sefydlu a rhedeg clybiau chwerthin ar draws Cymru. Bydd y clybiau'n galluogi pobl i ddysgu sgiliau a mecanweithiau ar gyfer delio gyda straen a sefyllfaoedd anodd, codi eu hunanhyder a'u gallu i fynegi emosiwn, gwella sgiliau cymdeithasol a'u helpu i gynyddu ymwybyddiaeth a dealltwriaeth o'u hunain a phobl eraill. 

Yn amlygu pwysigrwydd y prosiect, meddai Mr Robin Graham, un o Gyfarwyddwr ac yn Arbenigwr Chwerthin gyda Feelgood Communities: “Rydym wedi bod yn datblygu ein gwaith sy’n gysylltiedig â chwerthin ers 1998, gan gymysgu ymagwedd a dadansoddiad gwyddonol gyda syniadau creadigol cyfoes. Rydym wedi dod â’n sgiliau chwerthin i fusnesau, awdurdodau lleol, sefydliadau addysgol, mudiadau iechyd a mudiadau eraill yn y DU ac mewn gwledydd eraill, yn ogystal â rhannu syniadau trwy berfformiadau theatr.”

Ychwanegodd Robin, sydd ag MA mewn Ymwybyddiaeth Iechyd a Hapusrwydd: “Trwy chwerthin gallwn wella ein hiechyd a’n hapusrwydd a rheoli straen yn well. Yn syml, mae hyn oherwydd bod ein ffisioleg yn newid pan fyddwn yn chwerthin. Mae chwerthin yn ein helpu i gyflawni cydbwysedd eto. Mae’n ein helpu i fod yn fwy iach ac wedi’n hymlacio trwy ostwng yr hormonau straen, cynyddu gwrthgyrff i ymladd yn erbyn haint, gostwng pwysau gwaed, rhyddhau endorffinau sy’n rhoi’r ffactor ‘teimlo’n dda’ i ni a gwella anadlu a chylchrediad y gwaed. Mae hefyd yn brofiad a rennir sy’n creu cof da

Mae grantiau eraill a ddyfarnwyd yn amlygu amrywiaeth yr hyn y gellir ei ariannu trwy'r rhaglen Arian i Bawb. Bydd yr Ymgyrch Anaffylacsis yn defnyddio'u grant o £1,071 i gyflwyno gweithdy rhyngweithio yng Nghaerdydd i bobl ifanc 11 - 18 oed ag alergeddau difrifol, a bydd Cylch Meithrin Cwrt Henri yn Sir Gâr yn rhedeg prosiect o'r enw 'Cymraeg i’r teulu’ a fydd yn rhoi cyfle i rieni ddatblygu eu sgiliau Cymraeg gyda'u plant.

Ac mae'n amser chwarae yng Ngogledd Cymru diolch i'r dyfarniadau diweddaraf. Bydd Cylch Meithrin Porthmadog yng Ngwynedd yn gwario'u dyfarniad o £5,000 ar adnoddau addysgol a theganau gan gynnwys cyfarpar chwarae awyr agored i blant. Ac yn Rhosllannerchrugog, Wrecsam, bydd Canolfan Ceiriog CYF hefyd yn gwario'u dyfarniad o £3,436 ar ddatblygu ardal chwarae awyr agored i ddarparu man diogel ac ysgogol i blant sy'n mynychu'r Cylch.

Mewn prosiect rhwng y cenedlaethau, bydd Arts Alive yng Nghrucywel, Powys, yn gwario £5,000 ar ddod â phobl hŷn sy'n byw mewn tai lloches a phobl ifanc o loches i'r digartref ynghyd i greu gwaith celf sy'n archwilio themâu tai a digartrefedd. Ac yn olaf ond nid yn lleiaf, bydd Swallow Laryngectomy Club yn Aberdâr, Rhondda Cynon Taf, yn defnyddio'u £1,560 i drefnu gwibdeithiau cymdeithasol ar gyfer eu haelodau sy'n ailsefydlu ar ôl canser y gwddf i'w galluogi i addasu i'w cyflwr a gwella'u lleferydd.

Meddai Gareth Williams, Rheolwr Rhaglen Arian i Bawb y Gronfa Loteri Fawr yng Nghymru: “Mae Arian i Bawb yn cael effaith gadarnhaol ledled Cymru. Mae'r arian yn helpu sefydlu grwpiau, cymdeithasau a chlybiau, gan hyrwyddo dysgu, cynyddu cyfleoedd gwirfoddoli a helpu adeiladu cymunedau cryfach.”      

Mae'r ffurflen gais ar gael yn Gymraeg a Saesneg a gellir ei lawrlwytho o www.arianibawb.org.uk neu dros y ffôn ar 0845 4 10 20 30.

Rhestr lawn y dyfarniadau (Cliciwch yma am ddisgrifiad llawn o’r prosiectau)

Nodiadau i Olygyddion
• Yng Nghymru mae'r Gronfa Loteri Fawr yn dosbarthu bron £100,000 y diwrnod mewn arian y Loteri Genedlaethol ar gyfer achosion da, sy'n golygu, ynghyd â dosbarthwyr eraill y Loteri, bod y rhan fwyaf o bobl ar draws Cymru o fewn ychydig filltiroedd i brosiect a ariennir gan y Loteri.
• Mae'r Gronfa Loteri Fawr, dosbarthwr mwyaf y Loteri Genedlaethol ar gyfer achosion da, wedi bod yn dosbarthu grantiau i feysydd addysg a'r amgylchedd ac achosion elusennol ers iddi ddod i fodolaeth ym mis Mehefin 2004. Fe'i sefydlwyd gan Senedd y DU ar 1 Rhagfyr 2006.
• Ers i’r Loteri Genedlaethol ddechrau ym 1994, mae 28c o bob punt sy’n cael ei gwario gan y cyhoedd wedi mynd i achosion da. O ganlyniad i hyn mae dros £29 biliwn wedi’i godi a mwy na 383,000 o grantiau wedi’u dyfarnu ar draws meysydd y celfyddydau, chwaraeon, treftadaeth, elusennau, iechyd, addysg a’r amgylchedd.

Tags